Лілія Уладзіміраўна Іванова (на здымку) зараз працуе прадаўцом у магазіне “Родны кут”, а архіўны здымак быў зроблены карэспандэнтам райгазеты ў той перыяд, калі яна працавала майстрам вытворчасці на сыраробным заводзе нашага горада. Тады наўрад ці думала, што яна, спецыяліст малочнай індустрыіі, трапіць на працу ў гандлёвую сферу. Дарэчы, стаж працы Ліліі Уладзіміраўны на заводзе склаў 18 гадоў, а атрымала спецыяльнасць яна у Рыжскім механіка-тэхналагічным тэхнікуме харчовай прамысловасці. Маладая выпускніца ўстановы замацоўвала веды на практыцы, якую яна праходзіла на Рыжскіх харчовых заводах. І калі яна ўладкавалася на Чырыкаўскі сыраробны завод, то ёй вельмі спатрэбіліся базавыя веды і ўменні, а таксама парады былых педагогаў тэхнікума. Як майстар яна адказвала за арганізацыю працы работнікаў, за якасць прадукцыі, яе смакавыя ўласцівасці і непасрэдна за ўсю вытворчасць прадукцыі. За гэтыя гады яна вельмі параднілася з калектывам завода, ды ўжо набыла свой багаты вопыт па выпуску прадукцыі. Канешне, калі завод быў расфарміраваны, Лілія Уладзіміраўна была вымушана з іншымі яго работнікамі змяніць свой род заняткаў. Так яна трапіла на працу ў райспажыўтаварыства прадаўцом спачатку ў кнігарню, затым у “Візіт”. А калі пабудавалі новы будынак пад магазін “Родны кут”, перавялася туды. Спачатку прыходзілася прывыкаць да новых умоў працы, асваіваць усе тонкасці гандлёвага працэсу. Зараз у Ліліі Уладзіміраўны вопыт работы прадаўцом  ўжо складае 12 гадоў. Гэта прафесія патрабуе мець веды па ўсёй харчовай і спадарожнай прадуцыі магазіна, сачыць за тэрмінамі рэалізацыі, а таксама быць ветлівым з пакупнікамі. Напружаны працоўны дзень мяняецца на хатні клопат, калі яна прыходзіць дамоў. Пасля шэрага прац, Лілія Уладзіміраўна садзіцца за вязанне падчас прагляду якога-небудзь меладраматычнага фільма.

Акрамя змен на працоўным “фронце” у Ліліі Івановай адбыліся і сямейныя падзеі: ажаніла сына Уладзіміра, дачакалася ўнука, а нядаўна аддала замуж і дачку Алену.

      Алеся Панімаева