Сёння мы завязаны на стасунках анлайн, гэта зручна, хутка – проста выратаванне калі нехапае часу, а яго не хапае ва ўсіх. Аднак усе новыя і старыя тэхналогіі патрабуюць асцярожнага выкарыстання. Лішак інфармацыі прыводзіць да таго, што яна не засвойваецца, запамінаецца толькі самае простае. Вось і атрымліваецца, што мы цэлы дзень правялі анлайн, загрузілі галаву бясконцым патокам усякай інфармацыяй, а на выхадзе – стомленасць, невыкананыя справы, перагрузкі, залежнасць ад тэлефона.

У дадатак адтрымліваем раздражненне і злосць, а яшчэ пачыннаем параўноўваюць сябе з больш паспяховымі людзьмі, якія паспяваюць усё. «Бонусам» да гэтага ўсяго прыходзіць бяссонніца. Акрамя таго, сувязь анлайн не можа задаволіць нашу патрэбу ў эмацыянальных пачуццях. Усё гэта ўзмацняе пачуцці адзіноты і нездаволенасці сабой. Даем некалькі парад, каб гэтага пазбегнуць .

1. Раніцу пачынаем не з тэлефона

Знаёма? Ледзь расплюшчыўшы вочы рука цягнецца да смартфона: праверыць пошту, сацсеткі, прачытаць навіны. Глянуць, а ці не пакінуў хто паведамленні, колькі «падабаек» назбірала фота у сацсетцы і г.д. На наш мозг абвальваецца лавіна інфармацыі, а настрой чамусьці псуецца.

Важнае і першае правіла: прачнуўшыся, настроіцца на новы дзень, паляжаць у цішыні хаця б некалькі хвілін, адчуць сваё цела, пацягнуцца ў ложку, сказаць сабе штосьці добрае, узбадзёрыцца.

Затым зрабіць усе гігіенічныя працэдуры. І толькі пасля гэтага, ужо канчаткова прачнуўшыся, паглядзець у тэлефон. Многія людзі адзначаюць, што нават гэты пункт робіцца для іх складаным. Не правяраючы паведамленні пастаянна, яны літаральна адчуваюць інфармацыйную ломку. Нагода задумацца.

2. Адключаем гук і паведамленні

Расійскі псіхатэрапеўт Андрэй Курпатаў параўноўвае наша імкненне кідацца да тэлефона пры кожным сігнале тэлефона з рэфлексамі. Ад таго, што вы не адказалі ў гэтую ж секунду, нічога не здарыцца. Адкажаце тады, калі ўбачыце, а абвесткі пакіньця толькі на важныя нумары або групы.

3. Фільтруем непатрэбнае

Ад багацця разнастайных сацсетак і дадаткаў галава ідзе кругам, здаецца, што мінавіта яны нам патрэбны. Амаль у кожнага з нас іх больш за сотню, а ці сапраўды яны ўсе патрэбныя? Часцей проста цягнуць час і адцягваюць увагу, так што фільтруем непатрэбнае.

4. Ставім таймер для працоўных задачаў

Калі перад вамі ёсць працоўная задача, дык узнікае спакуса адцягнуць увагу: залезці спачатку «на пару хвілін» у Фэйсбук і знайсці пост пра суседа, праверыць новы рэцэпт чарговага блогера з інсты, «заліпнуць» на смешным відэа. І вось ужо прайшло 2-3 гадзіны, вы цалкам выматаныя, а нічога карыснага яшчэ не зроблена. Каб засцерагчы сябе ад такой сітуацыі, лепей карыстацца таймерам. Паўгадзіны-гадзіну канцэнтруемся выключна на працоўным пытанні, не чапаючы тэлефон, затым 15 хвілін адпачываем. Таксама строга па таймеры.

5. Рэгулюем час знаходжання ў сацсетках

Сацсеткі карысныя новымі важнымі знаёмствамі і кантактамі, але вельмі каварныя. Падглядванне у інтэрнеце за жыццём іншых людзей, правакуе на расчараванне ва ўласным: вось яны ўжо і спортам пазаймаліся, і кнігу прачыталі, і кар’ера, і дзеці, і дом заўсёды ў парадку, а я… Праблемы ёсць ва ўсіх. Але інтэрнет фільтруе і прапускае толькі самыя паспяховыя моманты. Таму наша ўласнае жыццё здаецца нам не такім удалым у параўнанні. У многіх гэта выклікае апатыю. Але мы не ведаем, з чым насамрэч сутыкаюцца гэтыя людзі. Здаеца, што шчасце і поспех ў інтэрнэце як штосьці нязменнае. Насамрэч у жыцці людзей здараецца ўсякае. Для таго, каб пазбегнуць спакусы параўноўваць сябе і псаваць гэтым настрой, праводзьце у сацсетках рэгламентаваную колькасць часу. Напрыклад, паўгадзіны ў дзень. Пэўныя праграмы дазваляюць устанавіць таймер, які будзе сігналізаваць пра тое, што свой сённяшні час вы ўжо вычарпалі.

6. Выдзяляем час без гаджэтаў штодня

Вызначыце для сябе час, у які вы будзеце мець стасункі толькі з роднымі ці зможаце прысвяціць сабе, цалкам засяродзіўшыся на адпачынку і не перагружаючыся інфармацыйным шумам. Напрыклад, гэта можа быць традыцыя вячэра, калі ўся сям’я мае стасункі ўжывую, а не гледзячы пастаянна на экран гаджата. Нават гэты невялікі, але рэгулярны час будзе важкім укладам у падтрыманне так патрэбнай для ўсіх нас эмацыянальнай сувязі с людзьмі.

7. Рухаемся мінімум 30 хвілін у дзень

Звычка пастаянна сядзець у тэлефоне прыводзіць не толькі да эмацыянальнага знясілення, але і стомленасці вачэй, болю ў спіне. Бо нярэдка, захапіўшыся, чалавек забываецца пра позу і сядзіць, скрукаваўшыся, гадзінамі. Паўгадзіны фізкультуры ў дзень дапамогуць вам лепей адчуваць сябе і фізічна, і псіхалагічна.

8. Арганізуем месца без гаджатаў дома

Раім не насіць з сабой смартфон па ўсім доме (асабліва ў прыбіральню і ванны пакой), а адвесці для яго сваё месца, куды вы час ад часу будзеце падыходзіць. Так залежнасць ад гаджата будзе паступова слабець.

9. Выкарыстоўваем прадметы па прызначэнні

Смартфон робіцца незаменным: тут і будзільнік, і нататнік, і падлік калорый, і дадатак для чытання кніг. Для таго, каб не дазволіць гаджату перацягнуць на сябе занадта шмат увагі, псіхолагі рэкамендуюць часцей выкарыстоўваць рэчы па прызначэнні: запісваць інфармацыю звычайнай ручкай у папяровы нататнік, завесці механічны будзільнік (гэта нават рамантычна), часцей чытаць папяровыя кнігі. Гэтыя простыя змены сапраўды дапамогуць развіццю мозгу.

10. Знаходзім цікавы занятак у рэальнасці

Часта мы пачынаем цягнуцца праверыць сацсеткі або пасерфіць у інтэрнэце не таму, што нам рэальна штосьці трэба даведацца, а… ад суму. Штораз, калі нам няма чаго рабіць, мы бяром у рукі тэлефон. А там ужо справа тэхнікі: інфармацыйная варонка пачынае засмоктваць. Як толькі вы адчуваеце, што хочацца пацягнуцца да тэлефона ад няма чаго рабіць, значыць, ваш мозг нічым карысным не заняты.

Адцягнуць увагу дапаможа цікавая справа ў рэальнасці, асабліва такое, якое паляпшае не толькі ваш дом, але і якасць жыцця. Кожны пры жаданні можа заняць сябе чымсьці цікавым не ў тэлефоне. Вядома, цяпер сітуацыя іншая. Для многіх адзіны спосаб атрымаць падтрымку і кантакт з іншымі людзьмі – стасункі анлайн, але ж навокал шмат цікавага

11. Арганізуем лічбавы выхадны.

Акрамя таго, каб знаходзіць хаця б гадзіну ў дзень на стасункі, адпачынак без тэлефона, планшэта, камп’ютара, тэлевізара, псіхолагі рэкамендуюць выдзяляць для такога рэлаксу адзін дзень штомесяц. Пры такім падыходзе галава робіцца яснай, сон і настрой паляпшаюцца. Хоць адзін дзень адключыце інтэрнэт. У гэты дзень не карыстастайцэся камп’ютарам, каб заняцца чым-небудзь іншым. Трэнд лічбавага дэтаксу робіцца суперпапулярным. Паехаць у маляўнічае месца, дзе не працуюць тэлефоны і вайфай, робіцца элітным баўленнем часу.

12. Не глядзім у смартфон за гадзіну да сну

Калі першае правіла лічбавага дэтаксу абвяшчае «не пачынаць дзень з тэлефона», дык не заканчваць свой дзень ім зробіцца не менш важкім укладам у ваша здароўе. Справа ў тым, што святло экрана ад смартфона занадта яркае, а для нармальнага начнога адпачынку нам патрэбная цемра.

Менавіта ноччу выпрацоўваецца жыццёва важны для нас мелатанін. Яркае святло, накіраванае прама ў твар у цёмны час сутак, збівае арганізм з панталыку. У жанчын такая сітуацыя можа прывесці не толькі да бяссонніцы, але і да збою менструальнага цыклу. За паўтары-дзве гадзіны да сну выкарыстанне гаджатаў рэкамендуецца выключыць. Дапамагчы можа звычайная папяровая кніга.

13. Ямо без гаджатаў

Часам замовіць піцу і паглядзець любімае кіно можа быць добрым варыянтам адпачынку. Але ўвесь час прымаць ежу ў спалучэнні з праглядам тэлевізара ці прагортваннем стужкі навінаў у смартфоне не варыянт па дзвюх галоўных прычынах.

Па-першае, адцягваючы ўвагу, вы не заўважыце, як адбылося насычэнне, і будзеце з’ядаць значна большыя порцыі, не клапоцячыся пра тое, як вы перажоўваеце ежу, не атрымліваючы асалоду ад яе смаку.

Па-другое, падчас ежы ваш мозг робцца занадта ўспрымальным да любой інфармацыі, а крытычнае ўспрыманне практычна не працуе. Таму замест адпачынку вы зноў загружаеце сябе бескарысным патокам інфармацыйнага фастфуду. Адсюль зноў пастаянная стомленасць, апатыя, віна. І хочацца суцешыць сябе, з’еўшы што-небудзь смачнае. Цыкл запусціўся.

Вядома, гаджаты і анлайн-стасункі – неад’емная частка сучаснага жыцця. Аднак важна ацэньваць карысць, рызыкі і знаходзіць аптымальны баланс, які дазволіць захаваць здароўе. Лепшая стратэгія для матывацыі – не ўшчуванне сябе штораз, калі штосьці не атрымалася, а пахвала за тое, што атрымалася. Дзякуйце сабе, калі ў вас атрымалася правесці якасны час без гаджатаў для сябе, са сваімі блізкімі. Для фарміравання здаровых звычак досыць пратрымацца 21 дзень. Затым гэта ўвойдзе ў вашае паўсядзённае жыццё і прынясе свае станоўчыя плады.