Віктар Іваноў — герой праекту «Гісторыя ў фотаздымках»
Шмат разоў раёнка пісала пра тых, хто належыць да катэгорыі людзей, у якіх у працоўнай кніжцы толькі адзін запіс аб прыняцці іх на працу. Вось менавіта так і склалася працоўная біяграфія галоўнага інжынера КУП “Чэрыкаўская ПМК -280” Віктара Іванова (на здымку), а яго прафесійны стаж адлічвае ўжо 31 год. Гэты факт пацвярджае наколькі чалавек захоплены сваёй справай на працягу ўсяго працоўнага жыцця і ў розных перыядах эканамічнага становішча прадпрыемства не шукаў, як кажуць, лёгкага хлеба, а заставаўся заўсёды верным абранаму раней працоўнаму месцу.
А пачаўся працоўны шлях Віктара Іванова ў будаўніцтве ў 1987 годзе, калі пасля заканчэння Магілёўскага будаўніцкага тэхнікума яго накіравалі ў Чэрыкаў у механізаваную перасоўную калону № 280 майстрам.
— Першы мой працоўны аб’ект — кацельная ў Язёрскім клубе, — успамінае Віктар Леанідавіч, — вось тады і прыйшоў першы вопыт ў будаўніц-тве і ў арганізацыі саміх будаўнікоў і працэсаў. Канешне, было нялёгка, але я нават не пашкадаваў, што працую на гэтым прадпрыемстве. А потым было шмат іншых распачатых і завершаных будаўніцтваў дамоў, будынкаў, пабудоў. Наладзіліся добрыя адносіны з самім калектывам, асноўны касцяк якога складаўся з прафесіяналаў сваёй справы, таму і працаваць было камфортна.
Потым Віктар Іваноў заняў пасаду прараба, а 16 гадоў таму стаў галоўным інжынерам. Праўда, адзін год па стане здароўя прыйшлося быць у баку ад працы, ад прадпрыемства, але пасля выздараўлення, ён зноў вярнуўся да сваёй справы, нібы і не было захворвання.
Зараз Віктар Леанідавіч з брыгадамі прадпрыемства працуе на закладцы новага жылога дома ў Чэрыкаве. Як сам кажа, будуць выкарыстаны ўсе рэзервы і прафесійныя патэнцыялы, каб будынак адпаведваў усім нарматывам.
Алеся Панімаева
