Кожны чалавек рана ці позна задае пытанні: Хто я? Дзе мае карані? Куды мы ідзем, і дзе наша месца ў свеце?
Адказы на іх можна атрымаць у школьным этнаграфічным музеі – цэнтры патрыятычнага выхавання, які спрыяе выхаванню ў кожнага навучэнца любві і павагі да сваёй краіны, якая пачынаецца з любві і павагі да малой радзімы, горада, школы, выхавання беражлівых адносін да гісторыі свайго народа.

Менавіта так лічыць кіраўнік школьнага этнаграфічнага музея ДУА «Сярэдняя школа №1 г. Чэрыкава імя Героя Савецкага Саюза Яўгена Нікалаенкі» Алеся Закоркіна. Гэтая пазіцыя Алесі Сяргееўны стала адпраўным пунктам для таго, каб разам з вучаніцай 11-га класа Ангелінай Старавойтавай узяць удзел у рэспубліканскім конкурсе этнаграфічных музеяў, які праводзіўся ў рамках акцыі «Я гэты край Радзімаю заву». Удзел стаў больш чым дзейсным. Скарбонка ўзнагарод школы папоўнілася дыпломам І ступені Міністэрства адукацыі Рэспублікі Беларусь.
— Для нас такі вынік стаў нечаканасцю, — падзялілася кіраўнік музея. — Бо на рэспубліканскі этап конкурсу ў намінацыях «Лепшы этнаграфічны музей (экспазіцыя)» і «У аб’ектыве музейная старонка» паступіла 202 работы з усіх рэгіёнаў рэспублікі. І стаць першымі — гэта сапраўдны гонар для нас і для ўсёй нашай школы. Мы прадстаўлялі свой музей у намінацыі «У аб’ектыве музейная старонка», падрыхтаваўшы «Даведнік па этнаграфічным музеі», з якім, дарэчы, можна пазнаёміцца на сайце школы.
Даведнік быў складзены з арыгінальным творчым падыходам, з размяшчэннем рэкламнага апісання экспазіцыі 7 раздзелаў музея, даведачных звестак некаторых экспанатаў і інш. Па выніках ацэнкі конкурсных матэрыялаў рэспубліканскім журы былі вызначаны пераможцы конкурсу, сярод якіх і мы. Наш музей стаў лепшым па накіраванні інфармацыйна-рэкламнае выданне.
На думку Алесі Сяргееўны, школьны музей — гэта своеасаблівае акно ў мінулае, якое злучае нітку паміж пакаленнямі, своеасаблівы абярэг народных традыцый, а заслужаны дыплом яшчэ раз сведчыць аб тым, што чэрыкаўлянам, як маладым, так і дарослым, ёсць чым ганарыцца, што захоўваць, а галоўнае — памятаць!
Ул.інф.

Поделиться ссылкой: