Народны каляндар: 30 сакавіка

30 сакавіка. Аляксей Цёплы (Аляксей Весняны). “На Цёплага Аляксея рыба ідзе на нераст, карова на верас, а бортнік на хвою”, “На Аляксея рыба аб лёд, санкі — аб плот”. У некаторых мясцовасцях пачыналі сеяць лён, авёс”. “Аляксей сохі чэшыць, хамуты строе”. У прырэчных вёсках Аляксей лічыўся днём рыбалова, рамантавалі рыбацкую снасць. Бортнікі падглядвалі пчол. Не ткалі. Перад сном дзяўчаты гадалі пра будучае замужжа. Перад сном казалі: “Святый Аляксей, я на тябе лён сею. Дай, Божа, знаць, з кім буду ў пары стаяць”.

Аляксей лічыцца цёплым днём і з ім звязана нямала народных прыкмет. «На Ляксея вол павінен з лужы напіцца». «На Аляксея лёд такі слабы, што і рыба хвастом разаб’е». У гэты дзень пілі святочнае пітво – мядова-бярозавы адвар. Чакалі таксама прылёту жураўлёў ці буслоў.

Нашы продкі лічылі гэты дзень днём рыбака. Трэба было напрасці нітак і сплесці з іх сетку, існавала перакананне, што такая прылада будзе лавіць шмат рыбы.

Імяніны: Аляксей, Макар, Амелія, Леанарда, Ян, Яна.