Даўней гэты дзень называўся Вукола-цялятнік. Лічылася, што целяцца жуколы (чорныя каровы). Казалі: «Прыйдуць Вуколы – перацеляцца ўсе жуколы». Таксама гэтак называлі кароў і цялят, якія нарадзіліся ў лютым. Існаваў такі звычай: як карова ацялілася, малодзіва трэба было праліць праз вянчальны пярсцёнак гаспадыні – тады ніякімі чарамі нельга будзе адабраць у гэтай каровы малако.

Мышы вылезлі з нораў – дзень будзе пахмурны. Калі марозна, то вясной будзе ўсё буяць, а лета будзе спякотным.

Чацвер Масленіцы — «Разгуляй», дзень калі пачынаюцца шырокія гулянні. У гэты дзень трэба спыніць усе работы па хаце, бо прынята весяліцца, вадзіць карагоды і спяваць песні, а яшчэ гуляць у снежкі, разводзіць вогнішчы і скакаць праз агонь і, вядома, аб’ядацца блінамі.

Імяніны: Аляксандр, Анатоль, Арсеній, Васіль, Дзмітрый, Іван, Максім, Севасцьян, Юльян, а таксама жанчыны з імёнамі Марыя, Крысціна, Марфа.