Агульны стаж кіроўцы ААТ “Чэрыкаўрайагра-прамтэхзабеспячэнне” Фёдара Раманенкі (на здымку) набліжаецца да 30 гадоў. За гэты даволі працяглы тэрмін  у працоўнай біяграфіі Фёдара Мікалаевіча было шмат розных рэйсаў і выкананых заданняў. Як даволі добрасумленны і адказны работнік, ён заўсёды імкнецца выканаць сваю справу як мага лепш,  як яго вучылі бацькі, затым старэйшыя калегі па працы.

Першым працоўным месцам Фёдара Раманенкі стала пасада механіка ў ААТ “Эксперыментальная база “Чэрыкаў”, куды ён уладкаваўся пасля арміі, маючы адпаведную адукацыю. У гаспадарцы ён вучыўся ўсяму, што спатрэбілася затым у яго жыцці: беражлівым адносінам да тэхнікі, своечасоваму яе рамонту, а таксама быць адказным ва ўсіх справах. Тут, у эксбазе, паспрабаваў свае сілы і падчас жніва, працуючы на камбайне. Менавіта з таго часу яму больш падабалася працаваць на тэхніцы, таму і наступныя працоўныя месцы былі звязаны з працай на аўтамабілях. Так, Фёдар Мікалаевіч паўгода працаваў у СФГ Марачкіна кіроўцам, а затым уладкаваўся на аналагічную працу ў ААТ “Чэрыкаўрайаграпрамтэхзабеспячэнне”, дзе паспяхова працуе і па сённяшні дзень. Трэба адзначыць, што шмат гадоў у сельгаспрадпрыемстве ён у ліку лепшых працаўнікоў, а на разгорнутых спаборніцтвах падчас уборачнай страды з’яўляецца сур’ёзнай канкурэнцыяй для калег па працы, бо заўсёды імкнецца выканаць сваю справу добра. Таму некалькі гадоў запар яго імя сярод перадавікоў гаспадаркі і нават у раёне.

Бягучы працоўны год не стаў выключэннем: было выканана шмат рэйсаў па перавозцы розных грузаў. Нават у зімні перыяд па даручэнні яго кіраўніка забяспечваў кацельную ЖКГ шчэпкамі для ацяплення.

Зараз у яго таксама няма прастояў у працы, і кожны дзень– новыя заданні. Фёдар Мікалаевіч і ў гэтым годзе прыме ўдзел ва ўборачнай кампаніі на адвозцы збожжа ад камбайнаў.

Алеся ПАНІМАЕВА.