Сёння ў нашых суседзяў у г.Слаўгарадзе праходзіць абласны фестываль-кірмаш “Дажынкі—2022”. Горад рыхтаваўся да свята працаўнікоў вёскі амаль цэлы год: значна пахарашэў, аднавіўся, набыў больш прывабны выгляд. І ўсё гэта для таго, каб шчыра вітаць сваіх гасцей, у ліку якіх і прадстаўнікі Чэрыкаўшчыны.
Ва ўрачыстасцях у гонар тых, дзякуючы каму на нашых сталах заўсёды ёсць духмяны хлеб, прымаюць удзел перадавікі сельгаспрадпрыемстваў, якія сёлета працавалі на жніве, кіраўнікі гаспадарак, ветэраны аграпрамысловага комплексу раёна. А яшчэ наш раён  шырока прадстаўлены на тэматычных пляцоўках, выставах-кірмашах. І гэта ўнёсак усіх працоўных калектываў Чэрыкаўскага края.

— Без перабольшвання адзначу, што да абласнога свята працаўнікоў вёскі мы рыхтаваліся ўсім раёнам, — распавядае старшыня раённага аб’яднання прафсаюзаў Юлія Сіўцова. — Да прыкладу, наша прадпрыемства “Бытпаслугі” пашыла абрус для дэгустацыйнага стала, стравы для дэгустацый распрацоўвалі і гатавалі райспажыўтаварыства і ліцэй, лясгас выканаў вялізны кавалак работы па падрыхтоўцы дэкарацый, і нават горгаз прадаставіў плазменны экран для дэманстрацыі на ім відэаролікаў.
Як паведаміла Юлія Уладзіміраўна, гасцей фестываля-кірмашу Чэрыкаўшчына будзе здзіўляць сваёй “Хлебнай гасцёўняй”, на якой прадстаўлены ўвесь асартымент хлебабулачных вырабаў хлебзавода Чэрыкаўскага райспажыўтаварыства. А на ўваходзе на падворак усталяваны два хлебных дрэвы, якія па сваёй форме і выкананню падобныя да калоссяў. Паколькі наш раён вырабляе не толькі хлеб, але і мясную, і каўбасную прадукцыю, гасцям нашага падворка прапаноўваюць пачаставацца натуральнымі мяснымі вырабамі, якія на дэгустацыйным стале сабраны ў кампазіцыю ў выглядзе карты Беларусі.
Выставу-продаж саджанцаў дэкаратыўных раслін сюды прывезлі Лабанаўскі ВПК і Чэрыкаўскі лясгас. Акрамя таго лясгас арганізаваў продаж мёда.
Афармленнем падворка займалася таксама лесагаспадарчае прадпрыемства: яго сіламі створаны стылізаваныя мосцік, калодзеж, лесвіца, фотазоны ў выглядзе сотаў, іншыя элементы дэкора.
— У нашай драўлянай хаце знаходзіцца прэс-цэнтр, у якім на плазменным экране дэманструецца відэаролік аб дасягненнях нашага раёна, працуе фотавыстава, — адзначыла суразмоўца. — Чэрыкаўскі ліцэй № 11 прымае ўдзел у абласным конкурсе на лепшы каравай, праводзіць майстар-класы па карвінгу: майстры ўсім жадаючым паказваюць, як са звычайнай гародніны можна прыгатаваць твор мастацтва. Безумоўна, сваю праграму прапануюць таксама работнікі культуры Чэрыкаўшчыны. Адным словам, калі вы яшчэ не ў Слаўгарадзе — паспяшайцеся, праграма разлічана да 20.00, і завершыцца яна святочным фейерверкам.