Зусім нядаўна на МТФ “Чэрыкаў” ААТ “Эксперыментальная база “Чэрыкаў” распачаўся этап рэканструкцыі будынкаў і ліквідацыя некаторых з іх старых. Раней кіраўніцтвам гаспадаркі было прынята  рашэнне: хлявы, якія ўжо нельга адрамантаваць, разабраць, а тыя, якія яшчэ можна прывесці ў належны стан — рэканс- труіраваць.  Дарэчы, малочна-таварная ферма была пабудавана дзесьці ў 1980-х гадах, таму пад уздзеяннем вільгаці і перападаў тэмпературы з цягам часу “жыллё” для жывёлы значна пашкодзілася, і яго не выкарыстоўваюць з-за  небяспечнасці. Два будынкі разабралі да фундаменту поўнасцю, трэці – толькі напалову, каб затым яго “рэаніміраваць”.

Таксама зараз надаецца ўвага памяшканню для цялят, у якім ужо зроблена значная частка работ. Брыгадзір МТФ Валянціна Кадзеля пры наведванні жывёлагадоўчага аб’екту карэспандэнтам “ВЧ”паказала і расказала, як вядуцца справы, што зроблена на гэтым участку рэканструкцыі,  што яшчэ будзе выконвацца.

–Гэты хлеў разлічаны на 250 цялят,– адзначае Валянціна Мікалаеўна.– Пакуль тут палова з запланаваных работ выканана. Адноўлены кармушкі для маладняка – зроблены цэментныя. Памянялі падлогу ў станках, таксама ўсё зацэментавалі. Працы, трэба адзначыць, было шмат, прыйшлося павазіцца. Як вы бачыце, яшчэ цэнтральная частка памяшкання не  адрамантавана, але ўсё будзе выканана па гэтым прынцыпе: заменена старая падлога на цэментную і пастаўлены аднаўлёныя кармушкі і станкі. Безумоўна, за пару дзён гэта ўсё не выканаць. У адрамантаваныя станкі ўжо пастаўлены бычкі і цёлачкі, а астатні маладняк бу-дзе “заселены”, калі ўмовы дазволяць. Пасля рамонту ажыццяўляць чыстку ўгнаення з памяшкання будзе трактар са спецыяльным абсталяваннем, што будзе значнай палёгкай для жывёлаводаў, якія раней гэтым займаліся ўручную. Яшчэ плануем менавіта ў хлеў падвесці ваду. Вядома, раней паілі цялят вадой, прынесенай з іншых памяшканняў. Уявіце сабе, каб 250 галоў маладняку напаіць, патрэбна амаль цыстэрна вады. А новы вадаправод дазволіць і гэту праблему вырашыць.

Брыгадзір таксама рассказала, што былі адноўлены вароты, зроблена іх умацаванне металапрофілем. Цяпер і “вецер не гуляе” праз шчэлкі. А сам хлеў цёплы і прасторны.

Абслугоўваюць жывёлу, як адзначыла Валянціна Кадзеля, пакуль два жывёлаводы, потым далучыцца да іх трэці. Утрымлівацца ў памяшканні будуць бычкі і цёлачкі ад 4 месяцаў да года: па палавой прыналежнасці па розныя бакі хлева.

Думаецца, хутка мы наведаем ферму, калі ўсе працы будуць скончаны, а запланаванае кіраўніцтвам– рэалізавана.