Яравая сяўба ў Чэрыкаўскім раёне працягваецца

У раёне зараз вядзецца актыўнымі тэмпамі масавая сяўба ранніх яравых культур, бо яшчэ дазваляюць тэрміны агратэхнічных мерапрыемстваў. Амаль што на палове з запланаваных 4466 гектараў палеткаў ужо пасеялі яравыя зерневыя. Надвор’е спрыяе, бадзёры настрой аграрыяў на працу таксама ўплывае на якасць зробленай працы.

Сярод раслінаводаў сельгаспрадпрыемстваў добра працуюць на сваіх палях і працаўнікі ААТ “Эксперыментальная база “Чэрыкаў”, дзе на пачатак вясновай сяўбы па плану неабходна бало засеяць 825 гектараў сельгаскультур разам з кукурузай. Саму сяўбу даверылі вопытнаму механізатару эксбазы Сяргею Яфрэмаву, які на працягу свайго перыяду працы больш за дзесяць гадоў менавіта добрасумленнасцю і адказнасцю кожны раз даказваў, што дрэнна працаваць наогул не ўмее. Самыя складаныя задачы механізатар здольны выканаць старанна і ў сціслыя тэрміны. Вось і сёлета ён зноў у страі, гатовы, як кажуць, у бой. Напярэдадні сённяшняга выпуску райгазеты карэспандэнт пабываў на полі, дзе прадаставілася магчымасць паразмаўляць з Сяргеем Яфрэмавым і сфатаграфаваць яго падчас маленькага перапынку.

У звязцы з паляводам працуе механізатар Уладзімір Зубараў, які заняты на падвозцы насення да бункераў пасяўнога агрэгату трактару.

          Алеся Панімаева