Корманарыхтоўка ў раёне распачалася, але менавіта на яе разгар і напружаны графік прыпаў перыяд дажджоў і навальніц. Першы ўкос  траў аграрыі будуць выконваць у складаных умовах надвор’я, бо сенаж, які зараз нарыхтоўваюць сельгаспрадпрыемствы, патрабуе спецыяльнай тэхналогіі, а лішак вільгаці можа толькі сапсаваць усе намаганні. Між тым, праца на полі кіпіць, і  ўся спецыяльная тэхніка  накіравана на касавіцу, каб хутчэй завяршыць распачатую справу,  бо травы наліліся сокамі.

Дарэчы, у раёне ўсяго падпадае пад першы ўкос 5000 гектараў сочнага мнагатраўя, вырошчванню якога раней надзялялася адпаведная ўвага. Сярод сельгаспрадпрыемстваў не стаіць у баку ад важнага мерапрыемства і КСУП “Прагрэс”, дзе таксама аператыўна вядзецца працэс нарыхтоўкі. На кашэнні траў тут задзейнічаны Генадзь Ткачоў (на здымку), на варушылцы падсушвае пакосы Вячаслаў Капцелаў, а на корманарыхтоўчым комплексе падбярае валкі і змяльчае зяленую масу Мікалай Кліндухаў. На адвозцы сенажа працуюць Юрый Гапееў і Пётр Драчаў. Па тэхналогіі сенаж патрабуе для кансервацыі і добрую трамбоўку, прычым якая павінна рабіцца кругласутачна. Гэтую справу выконваюць на Амкадоры ўдзень — Сяргей Іваноў, а ў начную змену выходзіць працаваць Аляксандр Кліндухаў. У гаспадарцы спадзяюцца, што надвор’е на намечаныя планы корманарыхтоўкі значна не паўплываюць, тым больш, што настрой у саміх працаўнікоў палёў бадзёры і, можна сказаць, баявы.